Total Pageviews

Tuesday, April 16, 2013

Pulitika at Showbiz: sari-saring hinuha



                   Para makakita sa dilim ay kailangan ng liwanag. Paano kung ang nagbibigay liwanag ay siyang bumubulag din sa atin upang makakita sa dilim?

                Ang politika ng Pilipinas ay minsan carnival at minsan fiesta, para kang nanonood ng drama sa TV, may halong katatawanan, drama, komedya, aksyon at minsan pa nga ay horror, ang showbiz ng totoong buhay. Ang mga mamamayan ang producer at ang iilan ang  direktor.

                Ngunit teka lang, bakit nasabi kong ang mga mamamayan ang producer?

                Ang sagot ay simple, mamamayan ang nagbabayad ng buwis na ginagamit ng mga artista ng gobyerno upang umarte na para bang nagworkshop at animo’y nadadala talaga ang mga producer na siya ring nagsisilbing manonood kahit medyo hilaw at di maayos ang arte. Hindi makapagsabi ang producer na pangit dahil di naman sila ang direktor (gets mo?). Ang medyo pangit pa dito ay literal na pinapasok ng mga artista ang politika, ang sining ng pamamahala ng mga tao, ang sining na nangangailangan ng natural na pag-arte, walang script kundi kusang mula sa puso na nangangailangan ng liwanag bilang gabay sa dilim ay tunay ngang nagliliwanag na.

                Ang pamahalaang Pilipino ay parang Pelikulang Pilipino na din sa di nagkakalayong anyo nito. Ang pamahalaan ay pinasok na ng mga bituin. Ang ilan sa kanila ay may alam naman talaga sa politika at kumbaga ay willing na matuto. Ang tanong ngayon bunga ng obserbasyon ko sa pamahalaan ay paano nila lubos na napapamahalaan ang kanilang nasasakupan kung bahagi ng kanilang oras ay iginugugul sa pag-arte at ang kalahati ay sa pamamahala at pagtugon sa mga pangangailangan ng mamamayan? Hindi ba’t nahahati nito ang atensyon nila (kunsabagay, may nag-iisip naman ata para sa kanila). Pero hindi naman talaga ito kataka-taka, ang iilan nga na tumanda na sa parehong larangan ay nakuhang balansehin ang kanilang oras sa iba’t-ibang asawa at nakuha pang magtatag ng dinastiya sa pamahalaan, sa politika at showbiz pa kayang dalawa lang.

                Ang katotohanan ay minsan mahirap tanggapin, lalo’t kung bahagi ka ng pagkukubli nito at pilit mong itatanggi kahit lutang na. Anong mapang-akit na halimuyak ang umaakit sa mga bituin upang bumagsak sa politika ng bansa? Bato-bato sa lupa, paghinagis, ang tamaan ay may bukol.

1 comment: