Ang magkakaparehong Tema ng Telenobelang Pilipino

Sa tuwing manonood ako ng mga drama sa Telebisyon tuwing gabi o maski sa hapon, napapansin ko na medyo "predictable" o madaling hulaan ang wakas ng kwento. Oo nga pala, dalawa lang ang pwedeng katapusan, mamamatay ang bida o mabubuhay siya pero syempre alam na kung ano ang mangyayari sa kontrabida, HINDI sya magwawagi.

May karaniwang anyo o pattern sa madaling sabi ang mga kwentong lumalabas sa telebisyon upang bigyan naman ng excitement ang mga manonood at mapahaba ang kwento at medyo inisa-isa ko ang sa tingin ko lang naman ay karaniwang takbo at nangyayari.

1. Ang Patay-Sindi pattern (Liwanag-Dilim-Liwanag)
    Napansin ko lang na sa tuwing magsisimula ang kwento, syempre masaya muna ang mga bida. Hindi magtatagal ay may kung anong mangyayari sa mga pangunahing tauhan at ang isa sa kanila ay magiging antagonista. Ang bida ay dadaan sa katakot-takot na pahirap ng antagonista. Pahihirapan siya ng husto hanggang sa may tutulong sa kanya upang maligtas. Magagapi nya ang kontrabida at tapos ang kwento. Diba ganun ang Esperanza at Mara Clara? eh yung Sana ay Ikaw na nga?.
    Minsan din ay magulo ang simula hanggang sa maayos ang lahat at sa bandang huli ay may lalabas na problema. Abangan ang sunod na kabanata. Ganito ang karaniwang takbo ng kwento nila kasi nga dapat makikita natin na sa bandang huli hindi nagtatagumpay ang masama sa mabuti at talagang nakakarelate ang mga kababayan dito.

2. Nasaan si Basilio blues
    Ito pa ang madalas sa mga kwento, nagkakawalaan ng anak ang mga pamilya o di kaya nagkakapalit dahil sa sakuna o nakatulog yung nanganganak o di kaya naman ay ninakaw, (Tayong Dalawa, Anakarenina, May Bukas Pa, Mara Clara, Esperanza, Muling Buksan ng Puso). Syempre lalaki ang nawawalang anak at malalaman nya ang katotohanan sa kanyang pagkato. Magsusumikap syang hanapin ang kanyang pamilya na nakakasalamuha nya lang pala, A small world Indeed!
    Karaniwan na ang mga nawawala at nagkakapalit sa kwento kaya minsan bago naman, nabuntis at iniwan ang nabuntis. Ang mga ganito naman ay karaniwang nagaganap sa tunay na buhay kaya medyo madali ding makarelate kumbaga.

3. The Cinderella Story
    Ang mga kwentong mala-Cinderella ay di naman nawawa sa Telenobela. Mga kwentong binihisan ng bago pero ganoon parin ang takbo, umiikot sa mga taong magpapaibig sa kanila at kukumpleto sa mga puso nilang nalulumbay dahil sila ay mga NBSB o NGSB. Karaniwan syempre ay mestiso ang gumaganap na prince charming para swak sa pagpapakilig sa madla.
    Hindi mawawala ang mga kontrabidang mang-aagaw sa ganitong kwento. Bakit di kasi nalang pabayaan silang mag-ibigan, kung hindi ang magulang na tutol sa mga taong nasa tamang edad na ay isang secretly inlove. Patunay lang siguro na minsan stiff ang competition lalo na kung mayaman, gwapo/maganda at matalino ang iyong iniirog.

4. The Agawan Blues o Love Triangle Issue
    Simula ng pumasok ang mga Asian nobela sa TV, napapadalas na mga kwentong may love triangle ang tema. Si A ay May gusto kay  B na gusto ni C na pwede ring si A at B ay gusto si C pero kailangan ni C mamila at ang dalawa ay magkaribal sa puso nya, magpapaligsahan ang dalawa hanggang sa tuluyang makuha ng isa si C. Eto ay medyo nakakakilig naman talaga kaya naimbento ang mga love team. Kaso dahil sa love team ay madaling mapredict kung sino ang magkakatuluyan sa huli. Diba?

    Sa apat na yan ay may isa dyan na kapansin-pansin sa mga palabas sa telebisyon. Pero hindi naman lahat sa mga nobela ay may ganoong takbo, may iilan sa pinilit umiba sa karaniwan kaso bibihira ang nagrerate kaya nawawala sa ere.
    Ang Telenobela ay solusyon sa bumabagsak na populasyon dahil sa dala nitong romansa sa isipan ng mga manonood. Pero ngayong madami na ang tao siguro dapat bago naman ang ihaing timpla. Magkaganoon pa man, hindi lang aliw ng mga palabas sa Telebisyon ang hatid nito sa tao kundi ang maaaring dulot nito sa kultura at pamumuhay ng tao dahil madalas sa minsan ay sinasalamin nito ang lipunan sa niromansang paraan.